Suriya XİN BMT baş katibinə və Təhlükəsizlk şurası sədrinə iki məktub göndərib.

Axar.az RİA Novostiyə istinadla bildirir ki, Suriya bu məktublarla dünən Dəməşqin iki rayonuna hava zərbələri endirən İsrailə qarşı sanksiyaların tətbiqini tələb edib.

Qeyd edək ki, dünən İsrail HHQ-si Dəməşq aeroportuna və şəhər ətrafına hava zərbələri endirib. Zərbələrin hədəfləri sırasında silah- sursat anbarı da olub. Məlumata görə, insan itkisi olmayıb. Suriya hava zərbələrini kəskin ittiham edərək bildirib ki, İsrailin bu hərəkətləri Suriya ordusunun terrorizmə qarşı müharibəsini dayandırmayacaq.

Suriya hökuməti İsraili dayandıracaq sanksiyaların tətbiq olunmasını tələb edib.

"İsrail Suriyanın bir sıra təşkilatlarına maddi ziyan vurmaqla ölkənin suverenliyinə qarşı dəhşətli cinayət işləyib", - Suriyanın САНА agentliyi nazirliyin bəyanatından sitat gətirir. XİN həmçinin bu kimi həmlələrin bir daha təkrarlanmaması üçün BMT nizamnaməsinə müvafiq şəkildə bütün prrosedurların tətbiq edilməsinə çağırıb.

Xatırladaq ki, 2011-ci ilin martından Suriyada davam edən hərbi münaqişə nəticəsində, BMT-nin məlumatına görə, 200 min insan həlak olub.