Çeçenistanın başçısı Ramzan Kadırov "Exo Moskvı" radiosunun baş redaktoru Aleksey Venediktovu müsəlmanları təhqir etməkdə və millətlərarası nifrəti qızışdırmaqda ittiham edib.

Axar.az "Azadlıq" radiosuna istinadla xəbər verir ki, Venediktov radio proqramlarından birində dinləyicilərə "Məhəmməd peyğəmbərin şəklini çəkmək olarmı?" sualı ilə müraciət edib.

Kadırov deyib ki, sualın belə qoyulması təxribat xarakteri daşıyır. O "Exo Moskvı" radiostansiyasını "anti-islam ruporu" adlandırıb.

Radionun baş redaktoru tezliklə Kadırovun cavabını verib. O deyib ki, Çeçenistan başçısının hədələrini çox real hesab edir və çox qısa zamanda hüquq-mühafizə orqanlarına müraciət edəcək. Aleksey Venediktov həmçinin Kadırovun "Exo Moskvı" haqqında fikirlərini böhtan adlandırıb.