Donbasda insanların öldürülməsinin məsuliyyəti cinayətkar əmrlər verənlərin üzərindədir.

Axar.az xəbər verir ki, Rusiya Prezidenti Vladimir Putin bu fikirlərini Təhlükəsizlik Şurasının daimi üzvlərinin yığıncağında bəyan edib. "Bunu edən insanlar bilməlidirlər ki, belə münaqişələrin sülh danışıqlarından və siyasi xarakterli vasitələrdən başqa həlli yolları mövcud deyil", - deyə prezident bildirib.

Putin əlavə edib ki, rəsmi Kiyevin sülh yolunu dəstəklədiyi barədə açıqlamaları həqiqət deyil:

"Biz tez-tez rəsmi Kiyevdən eşidirik ki, bu ölkədə məsələlərin məhz sivil yolla həllinə meyillidirlər, lakin reallıqda tamamilə başqa hadisələr baş verir. Ümidvaram ki, sağlam düşüncə əvvəl-axır qələbə çalacaq".

Putin Donbasda vəziyyətin nizamlanmasına dair təklifinə aydın cavab almadığını da bildirib:

"Təəssüf ki, biz nəinki aydın cavab almamışıq, hətta əks hərəkətlərin şahidi olmuşuq. Daha dəqiq desək, Kiyev hökuməti bütün təmas xətti boyunca irimiqyaslı hərbi əməliyyatların başlanması haqqında rəsmi əmr verib".