Dünya mediası Yunanıstanın Çe Gevarası adlanan Aleksis Tsiprasdan danışır. Ölkədə 41 ildən sonra iqtidara gələn solçu qüvvələrin lideri olan bu gənc siyasətçi barəsində CNN-Türk bioqrafik məqalə dərc edib.

Axar.az bu məlumatı oxucuların diqqətinə çatdırır:

Sriza partiyasının lideri olan Aleksis sol siyasətə 16 yaşlarından başlayıb. Yeniyetmə ikən hədəfi hakimiyyət olub. Seçkilərdə platforması dəyişməz qalıb – varlıdan alıb kasıba vermək.

O, Yunanıstanda 1957-1974-ci illər arasında "Polkovniklər Xuntası" dövrünü yaşamamış ilk siyasi partiya lideridir. Ölkənin bir sıra siyasətçiləri xunta zərbəsinin ağrılarını çəkiblər.

Amma Aleksis 1990-cı ildəki fəallığı ilə seçilir. Təhsil Nazirliyinin liseylərdə şagirdlərin məktəb xaricindəki həyatları üçün intizam cəzaları etirazlara səbəb olur. Məktəblər işğal edilir, etirazlar üç ay davam edir, şagird hərəkatında 5 nəfər ölür. Tsipras 16 yaşında ikən bu tarixi hərəkatın liderinə çevrilir.

O, Afina Texniki Universitetində inşaat mühəndisliyini bitirib. Kommunist Partiyasından ayrılandan sonra parlamentdən kənarda qalan müxtəlif sol fraksiyalarda iştirak edir.

Soyadı Tsipras olsa da, yoldaşları kiçik hərf dəyişikliyi edərək onu Çe-pras çağırmağa başlayır. Bununla, gənc sosialist argentinalı partizan Çe Gevara kimi yunanların yaddaşına həkk olunur. Onun ailəsi də idealist solçu olub.

Hələ "Sinaspismos" partiyasından 2006-cı ildə Afina bələdiyyə seçkilərinə namizədliyini irəli sürüb. İki il sonra partiya lideri seçilib. Bu partiya 6 sol təşkilatı özündə birləşdirməyə nail olaraq "Sriza" koalisiyası adlanır və 2009-cu seçkilərində Çe-pras millət vəkili seçilir. Nəhayət, bu il "Sriza" onun başçılığında ölkənin siyasi hakimiyyətinə gəlməyə müvəffəq olur.