"Rusiya Qərbə qarşı Cənubi Qafqazda öz maraqlarını qoruyacaq".

Bu sözləri Axar.az-a açıqlamasında politoloq Vəfa Quluzadə söyləyib. O, bölgədəki layihələrin təkcə Azərbaycana məxsus olmadığını bildirib:

"Bu dəqiqə bütün dünyada Qərblə Rusiya arasında qarşıdurma gedir. Yaxşı ki, bu qarşıdurma əsgəri deyil, yalnız iqtisadi səviyyədə qalmaqda davam edir. Qərb Rusiyanı sanksiyalarla tamam sıxışdırıb. Bir sıra ekspertlər hesab edirlər ki, hazırda dünyada neft Amerikanın yürütdüyü siyasətə görə ucuzlaşır. Bunun nə qədər həqiqət olduğunu demək çətindir. Rusiya belə məqamda, sözsüz ki, öz maraqlarını qoruyacaq. Buna şübhə etmək lazım deyil. Rusiya Azərbaycanın layihələrini əngəlləmək istəyirsə, o bir şeyi başa düşməlidir: Bu layihələr təkcə Azərbaycanın deyil. Belə layihələr Qərblə şərik proyektlərdir. Deməli, Moskva bizim regionda Qərbin maraqlarını əngəlləmək istəyir. Ona görə də bölgədə bu layihələrin nə qədər uğurlu olması Qərbin onları necə müdafiə etməsindən asılıdır".