Bakının Qaraçuxur məscidində baş verən təxribatdan sonra sabitlikdir.

Axar.az-a ibadət evinin şiə icmasından verilən məlumata görə, məscidin yandırılmasına cəhddən sonra hər hansı xoşagəlməz insident qeydə alınmayıb.

İcma nümayəndəsinin sözlərinə görə, məscidə gələn şiələr və sələfilər ayrı-ayrılıqda ibadət edir. Hər iki təriqətin icma rəhbərləri qrafik təyin edib və qarşıdurma yaranmasın deyə, birlikdə namaz qılınmır. İcma üzvünün dediyinə görə, PKK tərəfdarı olan Namiq Nəsibov və Elnur Ələkbərovun məscidi yandırmasından sonra hüquq-mühafizə orqanlarının nəzarəti də gücləndirilib. Məscidin darvazasından kənarda vaxtaşırı mübahisələr olduğunu qeyd edən icma üzvü içəridə buna yol verilmədiyini iddia edir. O, sələfilərdən əlavə Qaraçuxura xəvariclərin də gəldiyini, Suriyaya gedənlərin olduğunu istisna etmir.

Qeyd edək ki, kürd terror təşkilatının Azərbaycanda "Yekbun" adlı qruplaşmasının məqsəd və məramları olub. Qruplaşmanın həmtəsisçiləri – Namiq Nəsibov və Elnur Ələkbərov təşkilatı yaradarkən gələcəyə hesablanan ideoloji bir strategiya götürüblər. Onlar məscidə "İslam dövləti"ni (İŞİD) dəstəkləyən qüvvələr toplaşdığını əsas gətirərək ibadət evini yandırmağa qalxıblar.