Mustafa Kamal Atatürkün Türkiyə Böyük Millət Məclisinin açılışından 7 gün sonra Hollandiya xarici işlər nazirinə fransızca yazılmış məktubu üzə çıxıb.

Axar.az xəbər verir ki, 30 aprel 1920-ci il tarixli məktubda Atatürk avropalılara İstanbul hökumətinin hüquqi dəyərinin qalmadığını bildirib. O, məktubunda yeni yaradılan Türkiyə Böyük Millət Məclisinin vətənin müqəddəratını öz üzərinə götürdüyünü elan edib:

"Hörmətli nazir, İstanbulun müttəfiqlər tərəfindən haqsız işğalından sonra Osmanlı sultanını və hökumətini əsir olaraq qiymətləndirən xalqımız Böyük Millət Məclisini topladı və seçkilər keçirdi. Böyük Millət Məclisi 23 aprel 1920-ci ildə keçirilən açılış iclasında ölkənin işğal altında qaldığı müddətcə vətənin müqəddəratını öz üzərinə götürdüyünü elan etdi. Bununla da İstanbul hökumətinin (Osmanlı hökuməti) verəcəyi qərarların və imzalayacağı anlaşmaların heç bir hüquqi dəyəri olmayacaq. Osmanlı millətinin bu haqlı istəklərini müsbət qarşılayacağınıza ümid edirik".