Ermənistan Prezidenti Serj Sərkisyanın "Çiçəklənən Ermənistan" partiyasına və onun lideri Qaqik Çarukyana qarşı siyasi hücumlarından sonra bu partiyada istefalar davam edir.

Axar.az erməni mətbuatına istinadən xəbər verir ki, bu gün partiyanın üzvü, millət vəkili David Koçaryan "Çiçəklənən Ermənistan" partiyasından istefa verməsi barədə bəyanat yayıb. O, artıq müstəqil millət vəkili kimi fəaliyyət göstərəcəyini bildirib.

Həmçinin Ermənistan parlamentinin spikeri Qalust Saakyan daha iki partiya üzvünün - Məlik Manukyan və Qriqor Marqaryanın deputatlıq mandatından imtina ilə bağlı müraciət etdiklərini açıqlayıb.

Erməni Milli Konqresinin (EMK) liderinin müavini Levon Zurabyan isə "Çiçəklənən Ermənistan" partiyasına və onun lideri Qaqik Çarukyana qarşı aparılan təzyiqlərlə bağlı parlamentdə komissiyanın yaradılmasının zəruriliyini vurğulayıb:

"Təbii ki, biz sadəlövh deyilik. "Çiçəklənən Ermənistan" partiyasına və onun lideri Qaqik Çarukyana qarşı təzyiqlər hakim partiya tərəfindən aparılır və Serj Sərkisyan tərəfindən dəstəklənir".

Qeyd edək ki, son dövrlərdə Ermənistanda siyasi vəziyyət gərginləşib. Sərkisyan Çarukyanın siyasətdən getməsi ilə bağlı ona və ətrafına qarşı siyasi repressiyalara başlayıb. Nəticədə Sərkisyanla müxalifət lideri arasındakı görüşdən sonra müəyyən razılıq əldə olunub. Partiyanın fevralın 20-nə planlaşdırdığı aksiya təxirə salınıb. Partiyanın nüfuzlu üzvləri isə Çarukyanın bu qərarını dəstəkləməyiblər.