Dünyanın ən məşhur avtomat silah istehsalçılarından olan Kalaşnikov yeni modelini təyin edib.

Axar.az xəbər verir ki, yeni model məktəblilər arasında keçirilən dizayn yarışı zamanı seçilib.

Yarışda Yevgeniya adlı 5-ci sinif şagirdinin təqdim etdiyi model birinci olub. Bildirildiyinə görə, qalib şagirdlər gələcəkdə şirkətdə işlə təmin olunacaq.

Moskva Dövlət Sənaye Akademiyasında təşkil olunan yarışda çıxış edən Kalaşnikov firmasının baş direktoru Aleksey Krivoruçko ən vacib məsələnin yeni bazarlar tapmaq və daha çox silah satmaq olduğunu deyib.

Xatırladaq ki, Kalaşnikov Rusiyanın ən böyük döyüş avtomatı və snayper tüfəngi istehsalçısıdır. Şirkətin 51 faizi "Rostek" firmasına, qalan 49 faizi isə xüsusi sərmayəçilərə məxsusdur. 27-dən çox ölkəyə məhsul ixrac edən şirkət özü-özlüyündə "Kalaşnikov", "Baykal" və "İjmaş" olaraq 3 markaya ayrılır.

"Rostek" firması isə 2007-ci ildə qurularaq hərbi və mülki yüksək texnologiyalı sənaye məhsullarının istehsalı və ixracı ilə məşğuldur. Şirkət 9 holdinq və 700 quruluşa ayrılır. Rusiyanın məşhur AvtoVAZ, KamAz və bir çox məşhur firması "Rostek"in tərkibində fəaliyyət göstərir.

70-dən çox ölkəyə məhsul ixrac edən "Rostek" 2013-ci ildə 1,04 trilyon rubl (16.5 milyard dollar) qazanc əldə edib. Şirkətin dövlətə ödədiyi vergi isə təqribən 138 milyard rubla (2.3 milyard dollar) çatır.