"Forbes" jurnalının tərtib etdiyi dünya milyarderləri siyahısına altı azərbaycanlının adı düşüb.

Axar.az xəbər verir ki, siyahıya düşən azərbaycanlıların heç biri Azərbaycanda yaşamır.

Belə ki, onlardan beşi hazırda Rusiya, biri isə Türkiyə ərazisində yaşayır.

Soydaşlarımız sırasında ən varlı şəxs 12 milyard dollarlıq sərvətlə Vahid Ələkbərov olub. Keçən il siyahıda 96-cı yeri tutan Ələkbərov bu il də 96-cı yerdə qərarlaşıb. "Lukoyl" rəhbərindən sonrakı yerdə əslən Qubadan olan Qod Nisanov və Zarax İliyev qərarlaşıblar. Hər iki ortaq keçən ilə nisbət 59 pillə irəliləyərək 381-ci yeri tutublar. Onların hazırkı sərvəti 4,7 milyard dollar dəyərindədir. Digər azərbaycanlı milyarder Araz Ağalarov isə 2 milyardlıq sərvətlə 988-ci pillədə özünə yer edib. Ağalarov bu dəfə 18 pillə geriləyərək 1006-cı yerdə qərarlaşıb. Başqa bir həmyerlimiz olan Fərhad Əhmədov isə 1,4 milyardın sahibidir. Keçən il 1210-cu yerdə qərarlaşan milyarder hazırkı siyahıda xeyli geriləyərək 1324-cü yerə düşüb.

"Forbes"in siyahısında ən aşağı pillədə özünə yer edən soydaşımız isə Türkiyədə yaşayan milyarder Mübariz Mənsimovdur. 1,4 milyard dollara sahib olan Mənsimov siyahıda 1415-ci yerdə qərarlaşıb. "Palmali"nin sahibi keçən il 1284-cü yerdə qərarlaşmışdı.