“Terminal 1” şirkətinə məxsus Batumidəki neft terminalı erməni iş adamı Aram Qalstyan tərəfindən icarəyə götürülüb.

Axar.az xəbər verir ki, bunu “1in.am” saytına açıqlamasında gürcü politoloq Gela Vasadze deyib.

“Mənə bəlli olan odur ki, bu terminalı “Siti Petrol Servis” şirkəti Rusiyadan Ermənistana neft məhsulları tədarükü üçün istifadə edir. Bir müddət əvvəl terminalda modernizasiya işləri aparılıb. Maraqlı fakt odur ki, “Terminal 1” şirkətini Paata Salia idarə edir. Bu soyad məhkəmənin qərarı ilə “Rustavi 2” televiziyasına rəhbərlik edən hüquqşünasın soyadı ilə eynidir. Məhz bu qərardan sonra televiziya müxalifət yönümünü itirdi. Belə çıxır ki, bu şirkət hazırkı Gürcüstan rəhbərliyi ilə çox yaxındır”, – deyə o bildirib.

Qeyd edək ki, bundan öncə Ermənistan mətbuatı Batumi limanının satışa çıxarıldığı və fərqli erməni dairələrinin bu limanı almaq üçün pul yığdığı haqqında məlumat yaymışdı. Mətbuatın bu iddiasını Gürcüstan İqtisadiyyat Nazirliyi təkzib etmişdi.