Rusiya Prezidenti Vladimir Putin xarici ölkələrdən maliyyələşən qeyri-hökumət təşkilatlarının (QHT) rəsmi yoxlanmasından sonra onların "xarici casus" siyahısından çıxarılmasına imkan verən qanunu təsdiq edib.

Axar.az xəbər verir ki, ötən ayın sonunda Duma tərəfindən qəbul edilən yeni qanun Putinin təsdiqindən sonra 9 gün ərzində qüvvəyə minəcək.

Yeni qanuna görə, Rusiyadakı QHT-lər Ədliyyə Nazirliyinə müraciət edərək, "xarici casus" siyahısından çıxarılmağını tələb edə biləcəklər. Müraciətdən sonra təşkilat xəbərdarlıq edilmədən yoxlanılacaq və bundan sonra qərar veriləcək.

Yoxlama zamanı qurumun son bir il ərzində xarici ölkələrdən maliyyə vəsaitləri alıb-almadığı və Rusiyadakı siyasi proseslərə qatılıb-qatılmadığı yoxlanılacaq.

Xatırladaq ki, Rusiyada xarici ölkələrdən gələn pulla maliyyələşən QHT-lərin "xarici casus" olaraq qəbul edilməsini nəzərdə tutan qanun 2012-ci ildə təsdiq olunanda böyük səs-küyə səbəb olmuşdu.