Osmanlı padşahı V Məhmət Rəşadın nəvəsi Məhmət Nazim Əfəndinin üç oğlundan ilki olaraq 1939-cu ildə Qahirədə doğulan Çingiz Nazim Əfəndi Türkiyə vətəndaşı olub.

Axar.az xəbər verir ki, Nazim Əfəndi Türkiyə vətəndaşlığı haqda sənədi Nyu York səfiri Ərdəm Yalçının əlindən qəbul edib.

Fransa, Livan və Amerika vətəndaşlıqlarından sonra Türkiyə vətəndaşlığına qəbul edilən Çingiz Nazim Əfəndi 263 dollar ödəyərək 10 illik Türkiyə pasportu üçün müraciət alıb. Nazim Əfəndinin həyat yoldaşı amerikalı Suzanna xanım da türk vətəndaşlığına keçmək üçün rəsmi prosedurları başladıb.

Müraciət edəndən təxminən 1 il sonra Türkiyə vətəndaşı olaraq şəxsiyyət vəsiqəsi aldığını bildirən və buna görə çox xoşbəxt olduğunu qeyd edən şahzadə Çingiz Nazim Əfəndi Londondakı əmisi oğlunun və qardaşının da onun kimi yenicə türk vətəndaşı olduğunu deyib.

ABŞ-ı çox sevən şahzadə bunları deyib: "Çox zəngin adam deyiləm, amma ailəmi burada qurdum, buraya çox borcluyam. Amerikanı çox sevsəm də, Osmanlı ruhum Türkiyədədir. Yəni ürəyim ABŞ-da, ruhum Türkiyədədir".

Qeyd edək ki, 24-ü şahzadə, 15-i sultan, 23-ü sultanzadə və 13-ü sultan xanımdan ibarət olan 75 nəfərlik Osmanlı xanədanı 4 müxtəlif qitədə olduğu halda, ailənin ən yaşlı üzvü və ailə başçısı 1924-cü il Parisdə doğulan Osman Bəyazid Əfəndi Nyu Yorkda yaşayır.