Rusiyanın İkinci Dünya müharibəsində faşist Almaniyasına qarşı qazanılan zəfərin 70 illiyini qeyd etdiyi bir vaxtda maraqlı tarixi faktlar üzə çıxıb.

Axar.az-ın məlumatına görə, tarixçi Vladimir Vinokurov iddia edib ki, Hitlerin Sovet İttifaqına hücumundan öncə türk diplomatlar Stalini xəbərdar edib.

Vinokurov arxiv sənədlərindən istifadə edərək bildirib ki, 1940-ci ildə Almaniya, İtaliya və Yaponiya arasında pakt imzalandıqdan sonra Türkiyənin Tokiodakı səfiri Fərid Tək Sovet İttifaqının elçisi K.Smetanini ziyarət edib. Tarixçilərə görə, səfərin əsl məqsədi türk elçinin alman qoşunlarının SSRİ-yə hücum edəcəyi ilə bağlı rus diplomatı xəbərdar etmək olub.

Lakin buna baxmyaraq, rusiyalı diplomat Fərid Təkə inanmayıb. Almaniya ilə Sovet İttifaqı arasında "Hücum etməmək barədə" razılığın olduğunu deyib. Türk diplomat isə gülərək, "Bunlar sadəcə gözdən pərdə asmaq üçündür və rəsmidir", - deyə cavab verib.

Rus tarixçinin sözlərinə görə, 1940-cı ilin iyun ayında Türkiyənin Macarıstandakı səfiri Rövşən Əşrəf Ünaydın da Sovet elçisi Şaranova xəbərdarlıq edib. O, alman qoşunlarının Macarıstan üzərindən Rumıniyaya hərəkət etdiyini xatırladaraq, təhlükənin yaxında olduğunu dilə gətirib.

Türk diplomatların həmkarlarına xəbərdarlığı bununla bitmir. 1941-ci il yanvarın 4-də Türkiyənin Berlindəki səfiri Alkent də Sovet diplomatı V.Dekanozova Almaniyanın Sovet İttifaqına hücum edəcəyi ilə bağlı xəbərdarlıq edib.