Suriyada Əsəd rejiminə qarşı döyüşən Nusra Cəbhəsinin lideri Əbu Məhəmməd Culaninin "Əl-Cəzirə" televiziyasına verdiyi müsahibənin ikinci hissəsi yayımlanıb.

Axar.az-ın məlumatına görə, Əl Qaidənin Suriya qolunun rəhbəri şiələri və Qərbi hədəf seçmədiklərini deyib. Culani İŞİD-lə sülhün mümkün olmadığını da dilə gətirib:

"Hazırda və ya yaxın gələcəkdə İŞİD-lə danışıqlara başlamaq müzakirə mövzusu deyil. İnşallah, tövbə edərlər və ağıllarını başlarına toplayarlar. Əks halda, döyüşməkdən başqa çarəmiz qalmır".

Nusranın üçdə birinin ABŞ, Asiya, Rusiya və Çeçenistan vətəndaşlarından ibarət olduğunu deyən Culani Əsədin ən böyük dəstəkçisinin İran olduğunu bildirib:

"Tehran əsgər yox, hərbi məsləhətçi göndərir bura. İranın bölgəmizdəki qollarını kəsəcəyik".

İranın İraqı idarə etdiyi barədə gəzən iddiaların həqiqət olmadığını deyən təşkilat lideri bu məsələdə ABŞ-ı günahlandırıb:

"Həqiqət budur ki, ABŞ İraqı işğal etdi və qızıl qabda İrana təqdim etdi".