Tehranda rəsmi səfərdə olan Suriya Məclisinin sədri Məhəmməd Cihad Leham İran Prezidenti Həsən Ruhani ilə görüşüb.

Axar.az xəbər verir ki, Suriyadakı vəziyyətin müzakirə olunduğu görüşdə Ruhani sərt bəyanatlar verib. Xarici ölkələrin öz şərtlərini Suriya xalqına qəbul etdirməyə gücləri çatmayacağını deyən Ruhani Tehranın Dəməşqə hər zaman dəstək verəcəyini bildirib:

"Suriya xalqı bəzi ölkələr tərəfindən istəmədikləri bir döyüşə sürüklənir. Bir neçə ay ərzində Dəməşqi işğal edəcəklərini zənn edənlərin hədəfi dörd illik bir müqavimətdən sonra yox oldu. Terrorçular Suriya xalqını məğlub edə bilməyəcək".

Ölkəsinə verdikləri dəstəyə görə Həsən Ruhaniyə təşəkkür edən Leham bəzi ölkələrin ABŞ və Qərbin hazırlamış olduğu proqramı tətbiq etdiklərini deyib.

İrandan İŞİD-ə sərt xəbərdarlıq da gəlib. İran Silahlı Qüvvələrinin Baş Qərargah rəisi Seyid Həsən Firuzabadi terrorçuların İran sərhədinə 40 kilometr yaxınlaşacağı təqdirdə təşkilatı yox edəcəklərini deyib.