Ankaranın İŞİD-lə yanaşı PKK-ya savaş açması Qərbdə ciddi etirazlara səbəb oldu, Türkiyə hökuməti Suriyanın şimalında kürd planını pozmağa çalışır.

Türkiyə ordusu PKK və İŞİD silahı yerə qoyub təslim olana qədər əməliyyatları davam etdirəcək. Bundan başqa, PKK Türkiyə ərazilərini tərk edənə kimi Öcalanla heç bir görüş olmayacaq. Türkiyə hökumətinin qərarına görə, İŞİD-ə qarşı əməliyyatlar Türkiyənin sərhəd təhlükəsizliyinin təmin olunması, eləcə də Suriyanın konstruktiv müxalifətini müdafiə məqsədi güdəcək.

Ümumilikdə isə PKK və İŞİD-ə qarşı əməliyyatlar 3 mərhələdə həyata keçiriləcək. Musavat.com xəbər verir ki, PKK-ya qarşı əməliyyatların uzun zaman davam etməsi və terror təşkilatı silahlı yerə qoyana qədər davam etdiriləcəyi bildirilir.

Ancaq görünən odur ki, Türkiyənin qəflətən hər iki cəbhədə İŞİD və PKK terror təşkilatlarına qarşı savaşa başlaması Ankara üçün çətin sınaq olacaq. Artıq ölkənin cənub-şərq vilayətlərində PKK terrorçuları Türkiyə ordusuna və təhlükəsizlik qüvvələrinə hücumları artırıblar. Ötən gün terrorçular Hakkari vilayətində hərbi bazanın ərazisini qumbaraatan və iri kalibrli pulemyotlardan atəşə tutub.

Türkiyə Ordusu Baş Qərargahının yaydığı açıqlamada hücumun səhər saatların da baş verdiyi, sərhəd zastavalarına 7 mina atıldığı bildirilir. Açıqlamadan məlum olur ki, PKK yaraqlıları Türkiyənin ən həssas bölgəsi olan Hakkaridə xeyli fəallaşıb və ordu qüvvələrinə qarşı hücumlar təşkil edir. Bundan başqa ötən gün səhər saatlarında Şəmdinli rayonunda PKK-çılar yol təmiri ilə məşğul olan briqadaya hücum edərək 7 yol təmiri texnikasını yandırıblar. Bu isə terror təşkilatının Türkiyəyə qarşı ağır üzücü müharibəyə hazırlaşdığını göstərir.

Türkiyə aviasiyası isə İraqın şimalında dağlarda yerləşən PKK sığınacaqlarını bombalamaqda davam edir. Şimali İraq hökuməti Türkiyə Hərbi Hava Qüvvələrinin PKK nöqtələrini vurmasına münasibət bildirib. Ancaq məlum olub ki, bu mövzuda Ərbildə fikir ayrılığı var. Məsələn, muxtariyyətin lideri Məsud Bərzani və onun oğlu, kürd muxtariyyətinin baş naziri Nəçrivan Bərzani Türkiyənin hərbi əməliyyatlarını dəstəkləyən, baş verənlərə görə PKK-nı qınayan açıqlama yayıblar. Ancaq muxtariyyətin parlamentinin yaydığı açıqlamada Türkiyənin hava zərbələri qınanıb. Yusif Məhəmmədin sədri olduğu kürd parlamenti yaydığı yazılı açıqlamada hava zərbələrini "şiddətlə" qınadığı qeyd olunur. Sitat: "Türkiyədəki bütün hökumətlər kürd məsələsini hərbi yolla həll etməyə çalışdılar. Ancaq bu üsul sadəcə qan tökülməsinə, insanların yerindən-yurdundan olmasına və yoxsullaşmasına səbəb oldu".

Bu arada Türkiyə ordusu Suriya ərazilərindəki İŞİD mövqelərini vurmaqda davam edir. Suriya kürdlərinin silahlı təşkilatı YPG Türkiyə ordusunu İŞİD mövqelərini deyil, kürdləri vurmaqda ittiham edib. Sitat: "Türk ordusunun atəşi nəticəsində 4 əsgərimiz yaralanıb. Eyni zamanda türk əsgərləri bizə 7 tank mərmisi də atıb. Bu doğru bir hərəkət deyil. Bu barədə Türkiyəyə xəbərdarlıq edirik".

Qeyd edək ki, Ankaranın İŞİD-lə yanaşı PKK-ya qarşı hərbi əməliyyatları bərpa etməsi Qərb dövlətlərində ciddi narahatlığa səbəb olub. Almaniya müdafiə nazirindən sonra Britaniya mətbuatı da Türkiyənin qəflətən PKK-ya qarşı hərbi əməliyyatlara başlamasını tənqid edib. "Times" qəzetində dərc olunan məqalədə Türkiyənin PKK-ya qarşı əməliyyat başlatmasının faciəvi səviyyədə təhlükəli olduğu qeyd olunur. Eyni zamanda Prezident Ərdoğanın dərhal qərarını dəyişdirməli olduğu bildirilir. PKK-ya qarşı hava zərbələri və buna cavab olaraq kürdlərin hökumət qüvvələrinə hücumlarının yenidən müqavimət müharibəsinin başlamasına səbəb olacağının vurğulandığı yazıda Ankaranın PKK ilə savaşmaq üçün ən uyğunsuz zaman seçdiyi də qeyd olunur.

Qeyd edək ki, Türkiyənin İŞİD-lə eyni zamanda PKK-ya qarşı əməliyyatlara başlaması birmənalı qarşılanmayıb. Bəzi region ölkələri bu addımı Ankaranın islamçı qrupların təpksini çəkməmək üçün atdığını qeyd edir. Ancaq Ankaranın uzun müddətdir ehtiyatla davam etdirib sülh ərəfəsinə çatdırdığı bir münaqişəni qəflətən alovlandırması hələlik aydın deyil. Üstəlik Qərb mediası Suriyadakı və İraqdakı kürd silahlılarının İŞİD-ə qarşı ciddi müqavimət göstərdiyi və böyük uğurlar qazandığı bir zamanda Ankaranın ölkə daxilində və xaricdə kürdlərə savaş açması suallara səbəb olub.

Bu reaksiyalardan da görünür ki, Ankaranın yeni siyasi kursu Qərbdə o qədər də bəyənilməyib. Xüsusən də nəzərə almaq lazımdır ki, son bir ildə Qərb ölkələri, xüsusən də Avropa Yaxın Şərqdə - İraq və Suriyada – İŞİD terroruna qarşı məhz kürdləri dəstəkləyib. Məhz bu səbəbdən də kürdlər Suriya ərazisində böyük uğurlar qazanaraq geniş əraziləri ələ keçiriblər. Ankaranın bu addımı əslində kürdlərin mövqelərini ciddi şəkildə zədələyir. Hər iki halda bölgədəki durumdan narazı olan Ankaranın PKK və İŞİD-ə qarşı savaş açması bölgədəki yaranmaqda olan yeni hərbi-siyasi situasiyanı dəyişməyə çalışdığı hiss olunur. Ancaq buna nə qədər nail olacağı hələlik bilinmir.