Dağlıq Qarabağ ətrafında artan gərginlik Rusiyanın maraqlarına xidmət edir və hər an müharibə başlaya bilər.

Axar.az xəbər verir ki, bu barədə "Aljazeera.com" xəbər saytında geniş yazı dərc edilib.

Yazıda qeyd olunur ki, müvəqqəti atəşkəs sazişinin qüvvədən düşməsindən sonra Dağlıq Qarabağ üzərində nəzarəti ələ keçirmək istiqamətində mübarizə aparan tərəflər arasında münaqişə kəskinləşib. İki ölkə arasında konfliktin həlli mümkünsüz hala gəlib, bu isə Rusiyanın işinə yarayır. Moskva 1994-cü ilin may ayından etibarən mövcud qurumda Fransa və ABŞ arasında dominant ələ alıb. Minsk qrupunun yaradılması ilə Moskva mövqeyini möhkəmləndirmiş olub.

Sayt iddia edib ki, uzun müddət səssizliyin hökm sürdüyü Dağlıq Qarabağda son vaxtlar münaqişə kəskin dərəcədə pisləşib. Müntəzəm olaraq atəşkəs pozulur, itkilər olur.

Şərhdə bu ilin sentyabrından sürətlənən prosesin müharibəyə doğru getməsini göstərən 3 əsas səbəb aşağıdakı kimi xarakterizə edilib:

1. Artıq snayperlər əvəzinə top, raket atışları ilə hücumlar edilir. Bu vəziyyət daha ciddi fəsadların olacağından, əməliyyatların miqyasının əhəmiyyətli dərəcədə artacağından xəbər verir.

2. Qarşıdurmanın sahəsi Dağlıq Qarabağın sərhədlərini aşır və hazırda Ermənistan-Azərbaycan sərhədindəki əraziləri əhatə edir. Münaqişə sahəsinin genişlənməsi ilə pilotsuz hava vasitələrindən istifadə də azalıb.

3. Diplomatik variantlardan daha çox silahlı qüvvələrə üstünlük verilməyə başlanıb.
Artıq sülh danışıqlarına ümidini itirən Azərbaycan hücum əməliyyatına üstünlük verir. Buna qarşılıq Ermənistanın Azərbaycanın hücumlarına çətinliklə cavab verməsi münaqişənin böyüməsinə yol açır.

Hazırda hər iki tərəf də çətin bir dönəmə daxil olur, gərgin savaşın içərsinə yuvarlanır.
Bu proseslər zamanı mövqeyini möhkəmləndirən isə yalnız Rusiya oldu. Moskva tərəflərə silah verir, vasitəçilik edir, üstəlik, fəlakətin baş verib-verməməsinə qərar verəcək açar ölkə durumuna gəlib.

Dağlıq Qarabağ probleminin həlinin mümkünsüz hala gəlməsi, hər iki tərəfdə hərbi proseslərin başlanması Rusiyanın güc və təsirini artırıb. Moskva bu münaqişədən "təsadüfən bir müharibə" başladaraq regionda yeni düşmənlər yaratmaqla gücünü artırmaq niyyətindədir.

Rusiyanın siyasətində belə bir təhlükəli manevrə qarşı NATO Gürcüstanda hərbi təlim bazası yaratmaqla reaksiya verdi.

Rusiya həmçinin Dağlıq Qarabağa sülhməramlı qüvvələrini yeridərək bölgədə gücünü Cənubi Qafqaza yaymaq istəyir. Ancaq strateji baxımdan belə bir durum region üçün Rusiyanın Ukraynada yaratdığı müharibədən daha artıq bir qeyri-sabitlik yaradar.

Daha da əhəmiyyətlisi budur ki, Dağlıq Qarabağ müharibəsi sürətlə böyüyə, Türkiyə və İranın da qarşılıq verməsinə səbəb ola bilər.

Bu səbəbdən Qərb dövlətləri Rusiyanın Dağlıq Qarabağda "təsadüfi müharibə" planının qarşısını almaq üçün mövqelərini ortaya qoymalıdırlar.