Türkiyə Prezidenti Rəcəb Tayyib Ərdoğanın mühafizəçiləri ilə belçikalı VİP mühafizəçilər yumruqlaşıb.

Axar.az "Hürriyət"ə istinadən xəbər verir ki, Belçikada rəsmi səfərdə olan Türkiyə prezidentinin qorumaları ilə Belçikanın rəsmi qonaqlar üçün ayırdığı qorumalar arasında əlbəyaxa dava düşüb.

Belçika televiziyasının rəsmi saytında yayılan məlumata görə, səfər zamanı tərəflər arasında iki dəfə yumruqlaşma olub. İlk münaqişə bazar günü, oktaybr ayının 4-də yaşanıb: Rəcəb Tayyib Ərdoğanın türklərə müraciət etdiyi məkanda yerli (belçikalı) polislə türk mühafizəçiləri arasında ilk qarşıdurma yaşanıb.

Xəbərdə ikinci davanın bazar ertəsi baş verdiyi və daha şiddətli olduğu bildirilir. Tərəflər arasında meydana gələn anlaşılmazlığın əsas səbəbi olaraq hər iki tərəfin Türkiyə prezidentini qorumaq istədiyi göstərilib:

"Belçika polisi ölkəsində rəsmi səfərdə olan Prezident Ərdoğanı qorumağın vəzifə borcu olduğunu düşünür. Lakin türk mühafizəçiləri bunun onların borcu olduğu qənaətindədir. Tərəflər arasında bu səbəbdən meydana gələn gərginlik sonradan itələşmələrə və əlbəyaxa davaya gətirib çıxarıb. Daha sonra sakitlik bərpa olunub və araya sükut çöküb".