İraq təhlükəsizlik qüvvələri İŞİD lideri Əbubəkr Bağdadinin avtomobil karvanına təşkil edilən hücumla bağlı növbəti məlumat yayıb.

Axar.az xəbər verir ki, rəsmilər Bağdadinin yaralanması ilə bağlı öncədən yaydıqları xəbəri təkzib edərək təşkilat liderinin avtomobil karvanında olmadığını açıqlayıb.

"Avtomobil karvanında sıravi İŞİD üzvləri olub. Əldə etdiyimiz bütün məlumatlarda Bağdadinin hadisə yerində olmadığı göstərilir. Faktı dəqiqləşdirmək üçün araşdırmaları davam etdiririk", - deyə məlumatda bildirilib.

Xatırladaq ki, "Röyter" agentliyi İraq Hərbi Hava Qüvvələrinin Bağdadinin maşın karvanına hücum etdiyini, nəticədə təşkilat liderinin ağır yaralandığını iddia etmişdi.