Karl Marksın Londondakı məzarını görmək istəyənlərdən 4 sterlinq alınması marksistlərin qəzəbinə səbəb olub.

Axar.az xəbər verir ki, yeni nəsil marksistlər qəbiristanlıq rəhbərliyini "Kommunizmin Manifesti"ni yazan şəxsi kapitalizmə alət eməkdə günahlandırırlar. "Vall Strit Jurnal" qəzetinə müsahibə verən gənc marksist Ben Gliniecki bu ödənişə qarşı çıxaraq deyib:

"Bu, çox biabırçı qərardır. Bu ironiyanın sərhədi yoxdur".

Marksın nəşinin olduğu qəbiristanlıq rəhbərliyi isə əldə edilən gəlirlə 170 min insanın yatdığı qəbiristanlığın xərclərini qarşıladıqlarını qeyd edib. Rəhbərlik bunu "ironiya" adlandıran marksistlərə sərt cavab verib: "Əsil ironiya Marksın dövlətin təsis etdiyi bir sahəyə basdırılması əvəzinə özünə özəl bir məzarlıqdan yer almasıdır".

Xatırladaq ki, Karl Marks alman filosofu, siyasətçisi, marksizm-leninizm nəzəriyyəsinin banisi, "Kommunist Manifesti" və "Kapital" əsərlərinin müəllifidir. 1883-cü ildə ölən Marksın məzarını 1970 və 1975-ci illərdə dağıtmaq istəyiblər.