Yəməndə 37 yaşlı iki uşaq anası Qulruxsor Rəfiyeva silahlılara əsir düşüb.

Axar.az xəbər verir ki, tacik qadın Yəmənin Mərib şəhərində hərbi xəstəxanada tibb bacısı işləyib. Girovluqdan azad edilən Rəfiyeva vətənində BBC-yə müsahibə verib.

Onu girov götürənlər müqabilində qohumlarının həbsdən azad olunmasını tələb ediblər.

Hökumət rəsmiləri silahlıların Əl Qaidə üzvü olduqlarını açıqlayıb. Tibb bacısının azad olunması üçün danışıqlarda Tacikistan və Yəmən hökumətləri ilə yanaşı, yerli tayfa şeyxləri də iştirak ediblər.

Rəfiyevanın sözlərinə görə, yenidən Yəmənə qayıtmağa hazırdır, çünki ölkəsində aldığı maaş uşaqlarını dolandırmağa yetmir.

"Problem budur ki, orada qadın həkimlər yoxdur, hamısı xaricdən dəvət olunur. Məribdə məni hamı tanıyırdı, ona görə də oğurlananda bir çoxları azadlığımı tələb edən aksiyalara qatıldılar. Mənə yemək-içmək verirdilər. Onlar mənə vəd etmişdilər ki, bir-iki günə buraxacaqlar. Məni oğurlayan kişilər həbsxanadan kimlərinsə azad olunması barədə söhbət edirdilər. Başa düşdüm ki, məni həmin adamlarla dəyişməyə çalışırlar. Mənə deyirdilər ki, özümə qarşı heç bir qərəzləri yoxdur. Mənə min dollar maaş verirdilər, vətənimdə isə təcrübəli tibb işçisi kimi 30 dollar maaş alıram. Yəmən xalqı və hökuməti mənə çox hörmətlə yanaşırdı və əməyimi qiymətləndirirdi", - deyə Rəfiyeva bildirib.