Rusiya qırıcıları Suriyanın Hələb şəhərində növbəti dəfə mülki vətəndaşları hədəfə alıb.

Axar.az xəbər verir ki, qırıcıların şəhərin Zibdiyə məhəlləsində yerləşən uşaq bağçasını bombalaması nəticəsində 3 uşaq ölüb, 25 nəfər isə yaralanıb.

Qeyd edək ki, sözügedən məhəllə müxalif qüvvələrin nəzarətində yerləşir.

Hələbin ictimai fəalı olan Əhməd əbu Ammar bildirib ki, Rusiya mülki əhalini müharibə meydanında öldürməklə məğlubiyyətlərinin əvəzini çıxır:

"Rusiya son günlər Hələbdə mülki obyektləri bombalamağa başlayıb. Rus qırıcıları srağagün Anjarada məktəbi, dünən Hələbdə məscidi, bu gün isə uşaq bağçasını hədəf alıb. Ruslar döyüş meydanındakı məğlubiyyətlərinin əvəzini mülki əhalini öldürməklə çıxır. Buna baxmayaraq, Rusiyanın dəstəklədiyi Bəşər Əsədə sadiq qüvvələr Hələb vilayətlərində ciddi irəliləyiş əldə edə bilməyib".