Suriyanın Hələb şəhərinin Xan Tuman bölgəsində müxalif Şam Ordusu və Nüsrə Cəbhəsi qruplaşmalarının apardığı əməliyyatlar nəticəsində iranlı general Məcid Xan girov götürülüb.

Axar.az xəbər verir ki, Xan Tuman bölgəsində Hələb-Sarakin yolu uğrunda gedən döyüşlərdə müxalif qruplaşmalar böyük üstünlük əldə edib.

Fəth Ordusunun tabeliyində döyüşən müxalif Şam Ordusu və Nüsrə Cəbhəsi qruplaşmaları İranın dəstək verdiyi Tuqayların 90 döyüşçüsünü öldürüb.

Bildirilib ki, şiddətli döyüşlər zamanı müxaliflər Fatimuyn Tuqaylarına aid 3 tank və 2 zirehli texnika ələ keçirib. Həmçinin, İran İslam İnqilabi Keşikçiləri Korpusunun generalı Məcid Xan da girov götürülüb.

Qeyd edək ki, dünəndən etibarən Hələbin cənubunda Rusiya və İranın dəstəyi ilə Bəşər Əsədə sadiq qüvvələrlə müxalif qruplaşmaların birləşdiyi Fəth Ordusu arasında savaş davam edir.