İngiltərədə yaşayan rusiyalı milayrder Roman Abromoviçin 2002-ci ildə Rusiya lideri Vladimir Putinə 35 milyon dollar dəyərində yaxta hədiyyə etdiyi məlum olub.

Axar.az BBC-yə istinadən xəbər verir ki, bu barədə bir müddət dövlətə məxsus "Sovkomflot" gəmiçilik şirkətinə rəhbərlik edən Dmitri Skarqa məlumat verib.

O, 57 metr uzunluğunda olan "Olimpia" adlı yaxtanın təqdimatı zamanı orada olduğunu deyib:

"Abramoviç öz işçisi vasitəsi ilə gəmini Putinə təhvil verdi. Hadisə 2002-ci ilin martın sonunda Amsterdamda olub. Mən də o yaxtada idim. Abramoviçin nümayəndəsi vardı. O, yaxtanın sahibinin Roman olduğunu dedi".

Skarq dəbdəbəli yaxtanın Putinə bir ofşor şirkəti vasitəsi ilə verildiyini bildirib. Onun sözlərinə görə, gəminin xərcləri dövlət büdcəsindən ödənilib:

"Gəmi dövlətə yox, Putinə məxsus olduğundan, bu, gizli saxlanılırdı".

Qeyd edək ki, Abramoviçin vəkilləri bu iddianı rədd edib. Kremlin sözçüsü Dmitri Peskov isə açıqlamasında yayılan xəbəri "xəyal məhsulu" adlandırıb.

Vladimir Putin isə BBC-nin müsahibə tələbini qəbul etməyib.