Rusiya Prezidenti Vladimir Putin tabeliyində olan iş adamlarını Türkiyəyə qarşı hərəkətə keçirib. Putinin yaxın dostu Aleksandr Lebedevin sahibi olduğu "İndependent" qəzeti Türkiyəni suriyalı uşaqları tekstil sektorunda işlətməkdə günahlandırıb.

Axar.az xəbər verir ki, "İndependent"in bu iddiasına Türkiyənin tekstil şirkətləri kəskin reaksiya göstərib.

"Star" qəzetinə açıqlama verən İstanbul Paltar İxracatçıları Birliyinin sədri Hikmət Tanrıverdi Türkiyəyə qarşı qaralama kampaniyasının aparıldığını bildirib:

"Gəlib 14 min ixracatçı firmamızı bir-bir yoxlasınlar. Heç bir şey tapa bilməyəcəklər".

İstanbul Tekstil və Xammal İxracatçıları Birliyinin sədri İsmayıl Güllə isə qəzetin bu məqaləsini silahsız terror kimi qiymətləndirib.

Qeyd edək ki, "İndependent"in sahibi Lebedev Putinin yaxın dostudur və uzun illər KQB-də çalışıb. "Forbes" jurnalına görə, Lebedevin 1,1 milyard dollar sərvəti var.

Ötən ilin noyabrında Türkiyənin Rusiyaya məxsus Su-24 bombardmançısını vurmasından sonra iki ölkə arasında münasibətlər gərginləşib.