Əgər Rusiyaya Pankisi dərəsindən istifadə edib Gürcüstanı işğal etmək lazım olsa, bir dəqiqə belə bunun haqqında fikirləşməyəcəklər.

Axar.az xəbər verir ki, bunu Gürcüstan mətbuatına açıqlamasında politoloq Mamuka Areşidze söyləyib. Onun sözlərinə görə, Lavrovun Pankisi dərəsi ilə bağlı açıqlaması Tiflisə mesajdır:

"Mesaj bu idi ki, bizimlə dialoqu davam etdirin və əgər tərəflər arasında yaxınlaşma prosesi dayansa, biz Pankisi dərəsi faktorundan istifadə edəcəyik. Bu, təkcə bizə yox, həm də dünyaya mesaj idi. Ümumiyyətlə, Moskvanın indiki addımlarının son məqsədi Gürcüstanı hansısa vasitə ilə öz təsir zonasına qaytarmaqdır. Bir sözlə, Rusiya hadisələrə müdaxilə etmir, amma bir tərəfdən də dünyada xatırladır ki, Gürcüstan Pankisi kimi yer var. Təəssüf ki, Moskva bu ərazini uzun illər ərzində mənfi brend kimi formalaşdırıb və bundan sonra da onun vasitəsilə bizə təsir etməyə çalışacaq".

Qeyd edək ki, bir müddət öncə Rusiya Xarici İşlər naziri Sergey Lavrov jurnalistlərə açıqlamasında Pankisi dərəsində terrorçuların olduğunu bildirib. O, məhz bu ərazidən Suriyadakı terror təşkilatlarının əsas səhra komandirlərinin çıxdığını bildirib.

Pankisi dərəsi Gürcüstanın şimalında yerləşir. Bu ərazidə daha çox çeçenlər məskunlaşıb.