İranda hakim rejim daxili böhranlardan çıxmaq üçün son dörd onillikdə olduğu kimi müharibə qızışdırıcılığına və ekspansionizmə əl atıb, Yaxın Şərqi qanlı müharibəyə sürükləyib və məzlum Fələstin xalqının əzabından istifadə edib.

Axar.az xəbər verir ki, bu sözlər Dünya Azərbaycanlıları Konqresinin (DAK) bəyanatında əksini tapıb.

“Dörd ərəb ölkəsini işğal edən bu rejim hazırda Yaxın Şərqdə sülh, sabitlik və tərəqqi üçün ən mühüm maneəyə çevrilib. Belə bir durumun bədəlini isə İran və Yaxın Şərq xalqları yoxsulluq, ölüm və geriliklə ödəyir.

İranın daxilində sağalmaz iqtisadi və sosial böhranlar xalqın səbrini son həddə çatdırıb. İrandakı insanlar digər ölkələrlə sülh və dostluq içində, demokratik, ədalətli cəmiyyətdə yaşamaq istəyini dəfələrlə açıq etirazlar halında bildirib və etirazlar repressiyaya məruz qalıb. Dünyanın bu bölgəsində sülh və tərəqqinin bərqərar olmasının yeganə yolu İranda yaşayan insanların haqq mübarizəsini, demokratiya istəyini dəstəkləməkdir. Avropadakı İranlılar Komitəsi rejimin basqı və ədalətsizliyinə etiraz edən xalq hərəkatının iradəsini dəstəkləmək üçün bəyanat qəbul edərək, xarici ölkə parlamentlərində və dünyanın tanınmış siyasi xadimləri arasında qlobal kampaniya aparır. 2023-cü ildə oxşar bəyanat 29 ölkənin parlamentinin əksəriyyəti, 3600 parlament üzvü, 120 keçmiş dünya lideri və 75 Nobel mükafatı laureatı tərəfindən dəstəklənib.

Dünya Azərbaycanlıları Konqresi İran rejiminə qarşı insan haqlarını dəstəkləyən bütün demokratik, real güc sahibləri qüvvələrinin mübarizəsini təqdir edir və bölgədə azad demokratik idarəçiliyi vacib sayır”.