Azərbaycan dünyanın ən xoşbəxt ölkələri sırasında 81-ci yerdə qərarlaşıb.

ANS-in məlumatına görə, bu barədə Dünya xoşbəxtlik hesabatı"nın ("World happiness report") saytında yazılıb. 156 ölkənin yer aldığı siyahıda Azərbaycan 81-ci yerdə bərqərar olub.

Qonşu ölkələrdən ikisi reytinqdə ölkəmizi qabaqlasa da, üçü xeyli geri qalır. Belə ki, siyahıda İran 105, Ermənistan 121, Gürcüstan 126, Rusiya 50, Türkiyə isə 78-ci yerdə qərarlaşıb.

Birləşmiş Millətlər Təşkilatı (BMT) nəzdində Dayanıqlı İnkişaf Məsələlərinin Həlli Şəbəkəsi və Kolumbiya Universitetinin Yer İnstitutu tərəfindən hazırlanan bu siyahıda son üçlükdə Toqo (155-ci yer), Suriya (156-ci yer), Burundidir (157-ci yer).

Reytinq ölkələrin iqtisadi, siyasi, sosial, səhiyyə və digər sahələrdə inkişafının nəticələri əsasında hazırlanıb.

Ötən il isə Azərbaycan adı çəkilən reytinqdə qonşuları Gürcüstan, Ermənistan və İranı qabaqlayaraq 158 ölkə arasında 80-ci yeri tutub. İran siyahıda 110-cu, Gürcüstan 130-cu, Ermənistan isə 127-ci yerdə gəlir. Türkiyə 76, Rusiya 64-cü yerdə olub.

Hesabata görə, 2015-ci ildə dünyada ən xoşbəxt ölkə İsveçrədir.