Bakıda keçiriləcək Formula-1 Avropa Qran Prisində "Baku City Circuit" trası dünyada bütün şəhər trasları arasında ən sürətlisi olacaq.

ANS-in məlumatına görə, bunu "Baku City Circuit" trasının almaniyalı arxitektoru German Tilke deyib.

Tilkenin sözlərinə görə, Bakıdakı Formula-1 trası digərlərindən çox fərqlənəcək:

"Bakı mərhələsi təqvimdə ən həyəcanlı mərhələlərdən biri olacaq. Əlbəttə, Bakıdakı trası digər traslarla müqayisə etmək olmaz, çünki şəhərin içində qurulub. Bununla yanaşı, digər şəhər traslarından fərqlənir. Bizim hesablamalara görə, bir dairəni keçmə müddəti təxminən 101 saniyə təşkil edəcək, lakin əlbəttə ki, bu, yarışçıların hazırlığından asılı olacaq.

Trasda ən mürəkkəb döngələrdən biri 8-cidir, burada maksimum sürət saatda 204 kilometr olacaq. 8-ci ilə 9-cu döngələr arasındakı məntəqədə minumum sürətin saatda 86 kilometr olacağı gözlənilir".

German Tilke qeyd edib ki, Bakıdakı trasda 2014-ci ildən işləməyə başlayıb. Almaniyalı arxitektor Bakının gözəlliyini vurulduğunu deyib. O, paytaxt sakinlərinin qonaqpərvər olduğunu və yarışın start verilməsinə yaxınlaşdıqça daha çox həyəcanlandığını bildirib.

17-19 iyun tarixlərində Bakıda keçiriləcək yarışda dünyanın ən güclü pilotları qalib adı uğrunda mübarizə aparacaqlar. Yarışları izləmək üçün biletlər fevral ayının 19-dan satışa çıxarılıb. Biletləri Bakı Şəhər Halqasının rəsmi saytından əldə etmək olar.