Dünən Mixail Qutseriyevin ikinci oğlu Səidin toyu olub.

Publika.az xəbər verir ki, milyarder oğlunun toyuna dünyanın ən tanınmış ulduzlarını dəvət edib.

"Safisa"da baş tutan toyda Beyons, Ceylo, Elton Con, Patrisiya Kaas, Enrike İqlesias, Stinq və başqaları iştirak edib. Qonaqları təkcə xarici ulduzlar deyil, həm də dünya miqyaslı "Ləzginka" ansamblı əyləndirib.

Toyla bağlı digər maraqlı məqam gəlinin paltarının çəkisi olub. Verilən məlumata görə, "Ellie Saab"dan olan gəlinliyin çəkisi 25 kiloqramdır. Gəlinin əslən İnquşetiyadan olduğu qeyd olunur. Toyda İnquşetiyanın birinci prezidenti Ruslan Auşev də iştirak edib.

Rusiya mətbuatının yazdığı məlumata görə, milyarderin oğlunun toyunu belə dəbdəbəli formada keçirmək üçün külli miqdarda pul xərclənib. Belə ki, Ceylonun 5, Elton Conun isə toya 7 milyon avroya gəldiyi deyilir.

Xatırladaq ki, "Forbes" Qutseriyevləri Rusiyanın 2015-ci ildə ən varlı ailəsi kimi göstərib. Onların təkcə ötən il sərvətlərinin həcmi 4,85 milyard dollar təşkil edib.