Cənubda Türkiyə, şimalda Norveç və ABŞ, qərbdə Kanada və Böyük Britaniya olmadan Avropa qitəsinin təhlükəsizliyini təsəvvür etmək mümkün deyil.

Axar.az xəbər verir ki, bu sözləri Yens Stoltenberq NATO-nun baş katibi kimi vida nitqində deyib.

“Avropalılar anlamalıdır ki, NATO-suz Avropada təhlükəsizlik olmayacaq. NATO-nun müdafiə xərclərinin 80 faizi AB üzvü olmayan ölkələrdən gəlir. Və bu, təkcə resurslara aid deyil. Bu həm də coğrafiya məsələsidir”, - NATO-nun baş katibi bildirib.

Onun sözlərinə görə, Trans-Atlantik Alyans Avropaya yaxşı xidmət edib:

“Daha sıx Avropa inteqrasiyasına yol açmaq, Almaniyanın yenidən birləşməsi, Mərkəzi və Şərqi Avropada demokratiya və azadlığın yayılması - bu, avropalıların yadda saxlamalı olduğu bir tarix dərsidir.

Trans-Atlantik alyans ABŞ-a da yaxşı xidmət göstərib. Amerikanın dostları və müttəfiqləri Amerikanın təhlükəsizliyinə və maraqlarına əvəzsiz töhfələr verirlər. NATO müttəfiqləri Koreyadan Əfqanıstana qədər ABŞ-la yanaşı dayandılar. Və bunun üçün yüksək qiymət ödədilər. Avropalıların “biletsiz sərnişinlər” olması doğru deyil. Heç bir böyük dövlətin ABŞ qədər dostu və müttəfiqi yoxdur. Bunu pozmağa çalışan istənilən siyasət Amerikanın ən böyük sərvətlərindən birini puç edir”.