Moskva məhkəməsi 59 yaşlı tibb bacısı Olqa Menşixi Rusiya ordusu haqqında “saxta xəbər” yaymaqda təqsirli bilərək, 8 il müddətinə azadlıqdan məhrum edib.

Axar.az xəbər verir ki, bu barədə “Mediazona” məlumat yayıb.

Məlumata görə, Menşix 14 iyul 2022-ci il və 31 mart 2023-cü il tarixlərində VKontakte sosial şəbəkəsində iki post yerləşdirib. Birinci postda Rusiyanın Ukraynanın Vinnitsa şəhərini atəşə tutması nəticəsində həlak olanlardan danışıb və Rusiya XİN-in spikeri Mariya Zaxarovanı tənqid edib. İkinci postunda isə Buça qurbanları haqqında informasiya paylaşıb.

Müstəntiqlər qeyd ediblər ki, o, postları Rusiya hakimiyyətinə, hərbi qulluqçulara, Rusiya xalqına və bütövlükdə ölkəyə qarşı qeyri-dost, düşmən-aqressiv münasibəti rəhbər tutaraq hazırlayıb.

Tibb bacısı səhifəsinin “sındırıldığını” iddia edərək, yazıları özünün yerləşdirmədiyini bildirib.