Dördgünlük müharibə zamanı cəbhədə yaralanan ermənilərin Xankəndində müalicəsinə dərman və həkim çatışmır.

Axar.az erməni mediasına istinadla xəbər verir ki, buna görə Qarabağ separatçları yardım istəyib. Medianın məlumatına görə, Moskva Erməniləri Assosiasiyasının üzvü Qriqor Karapetyan aprelin əvvəlindən bu çağırışa uyğun olaraq Moskvadan 4 erməni həkimin Qarabağa göndərildiyini bildirib.

Onun sözlərinə görə, erməni əsgərləri ağır vəziyyətdədir və bu həkimlər də çətin əməliyyatlarda iştirak edirlər.
Ermənistan Müdafiə Nazirliyinin hərbi hospitalının cərrahiyyə şöbəsinin müdiri Levon Jamaqortsyan isə bildirib ki, bu cür ağır əməliyyatlar gün boyu davam edir. Aprelin əvvəlində gələn həkimlərin işi çox olduğu üçün onlar hələ də Xankəndindədirlər.

Bu arada dərman çatışmadığı üçün separatçılar dünyadakı erməni diasporuna da müraciət ediblər.

Xatırladaq ki, ötən gün Dağlıq Qarabağdakı xəstəxanalarda olan erməni yaralı əsgərlərdən 36 nəfər İrəvana aparılıb. Onların müalicəsi üçün Xankəndində şəraitin olmadığı açıqlanıb.