2024-cü ildə ayda orta hesabla 11 minə yaxın suriyalı könüllü olaraq təhlükəsiz şəkildə vətəninə geri qayıdırdı. Gün ərzində 300-350 geridönüş var idi. Bu gün isə sıxlıq daha çoxdur. Bu gün günorta saatlarına kimi keçiş 700-ə yaxın olub.

Axar.az xəbər verir ki, bunu Türkiyə daxili işlər naziri Əli Yerliqaya jurnalistlərə açıqlamasında deyib.

“Daha əvvəl sərhəd-keçid məntəqəsindən geri qayıdanlar üçün gündəlik limit 3000-ə yaxın idi. Gündə 300-350 nəfərin keçdiyi üçün bu limit kifayət edirdi. Lakin geri qayıdanların sayının artığını nəzərə alaraq, bu limiti 15-20 minə çatdırmışıq”, - nazir qeyd edib.

Ə.Yerliqaya eyni zamanda vurğulayıb ki, yaxın müddətdə Prezident Rəcəb Tayyib Ərdoğan Yayladağı sərhəd-keçid məntəqəsinin açılacağını elan edəcək.

Nazir əlavə edib ki, 2016-cı ildən bu günə kimi 737 min suriyalı vətənlərinə təhlükəsiz şəkildə geri qayıdıb:

“Hazırda Türkiyədə müvəqqəti qoruma altında olan suriyalıların sayı 2 milyon 936 min nəfərdir”.

Qeyd edək ki, bir müddət əvvəl Suriyada müxaliflər paytaxt Dəməşqi ələ keçirərək Bəşər Əsəd rejiminin devrildiyini elan edib. Bundan sonra Türkiyədəki suriyalı qaçqınların vətənlərinə qayıtması sürətlənib.