BMT-nin Baş katibi Antonio Quterreş ABŞ-ın xarici yardımı dayandırmaq qərarından narahatlığını ifadə edib.

Axar.az xəbər verir ki, bu barədə brifinqdə BMT Baş katibinin sözçüsü Stefan Düjarrik deyib.

"Baş katib ABŞ-ın xarici yardımının dayandırılması barədə elanı həyəcanla qarşıladı. O, həyatları və dolanışıqları bu dəstəkdən asılı olan dünyanın ən həssas icmaları üçün kritik inkişaf proqramlarının və humanitar səylərin davam etdirilməsini təmin etmək üçün əlavə güzəştlərin nəzərdən keçirilməsinə çağırır”, - S.Düjarrik bildirib.

Qeyd edək ki, ABŞ Dövlət katibi Marko Rubio xarici yardımla bağlı demək olar ki, bütün proqramların, o cümlədən Ukraynaya yardımların 90 gün müddətinə dərhal dayandırılması barədə göstəriş verib.