Ağ Ev Kanada neftinə 25 faizlik gömrük rüsumunu tətbiq edərsə, ABŞ Venesueladan neft almağa məcbur olacaq.

Axar.az xəbər verir ki, bunu Kanadanın xarici işlər naziri Melani Coli deyib.

“Biz endirimlə neft tədarük edirik və nəticədə o, Texasda emal olunur. Bunu etməsək, Venesuela edəcək. Başqa çıxış yolu yoxdur və bu administrasiya Venesuela ilə işləmək istəmir”, - o bildirib.

Coli qeyd edib ki, Kanada idxalına 25 faizlik tariflərin qəbulu sadə insanlara ağır zərbə vuracaq:

“Çünki Kanada ilə ABŞ arasında münasibətlər ticarət müharibəsinə çevrilə bilər”.

O, Donald Trampın Kanadanın ABŞ-a qoşulması fikrini tənqid edib:

“Biz həqiqətən yaxşı dost ola bilərik, amma heç vaxt ştatlardan biri və ya müstəmləkə olmayacağıq, nöqtə”.

Qeyd edək ki, Tramp Kanada neftinə rüsumların artırılması ilə bağlı hələ qərar vermədiyini bildirsə də, Kanada və Meksikadan idxal edilən mallar üçün tariflərin 25%-ə qədər artırılmasının şənbə günü qüvvəyə minəcəyini təsdiqləyib.