ABŞ kəşfiyyatının məlumatına görə, Vladimir Putin müharibəni dayandırmaq üçün Donald Tramp administrasiyası ilə danışıqlara başlasa da, hələ də Ukraynanı ələ keçirməyə çalışır.

Axar.az xəbər verir ki, bu barədə “NBC Nyus” Qərb kəşfiyyat orqanlarının dörd nümayəndəsinə və ABŞ Konqresinin iki üzvünə istinadən məlumat yayıb.

“Hazırda Putinin real sülh razılaşmasında maraqlı olması barədə heç bir məlumatımız yoxdur”, - ABŞ Konqresinin nümayəndələrindən biri bildirib.

Qeyd olunub ki, Ər-Riyaddakı danışıqların əsas məqsədi Ukraynada müharibənin mümkün sonunu müzakirə etmək olub:

“Lakin hazırkı kəşfiyyat məlumatları Putinin gələcəkdə bütün ölkəni ələ keçirmək fürsətinə ümid etdiyini göstərir. O, qalib gəldiyini düşünür. Ordusunun döyüş meydanında xeyli sayda itki verməsi Putini məqsədlərini yenidən nəzərdən keçirməyə və ya hərbi əməliyyatları dayandırmağa sövq etmir. Putin danışıqlardan ordunu yenidən qurmaq və mövqelərini möhkəmləndirmək üçün taktiki pauza kimi istifadə edə bilər. Putin atəşkəs və ya müvəqqəti sülhə razılaşsa belə, bu, yalnız qüvvələrin yenidən qruplaşdırılması üçün vaxt udmaq cəhdi ola bilər”.