Kiyev Ukrayna Prezidenti Vladimir Zelenskinin Ağ Evdəki davranışına görə üzr istəməyəcək.

Axar.az xəbər verir ki, bu sözləri Ukrayna Prezident Ofisi rəhbərinin müşaviri Mixail Podolyak Fransanın “Le Point” nəşrinə müsahibəsində deyib.

Podolyak bildirib ki, Zelenski forma və məzmun baxımından tamamilə haqlı idi:

“Ukrayna prezidenti amerikalı tərəfdaşlarına Rusiyaya təzyiq etmədən heç bir iş görülməyəcəyi ilə bağlı əsas ideyanı çatdırmağa çalışır. Ona görə də olmayan səhvə görə üzr istəməyəcəyik”.

Podolyak Ağ Evdəki mübahisəni Zelenskinin və onun vasitəsilə bütün ukraynalıların alçaldılması kimi qiymətləndirməyib:

“Bu, alçaldılma məsələsi deyil. Bu, siyasi liderlər arasında çox emosional müzakirədir. Paradoksal olsa da, bu görüş müəyyən mənada faydalı oldu. Fərqlərimizi vurğulamaqla biz öz fikirlərimizi aydınlaşdıra bilərik”.

O əlavə edib ki, Kiyev bu mübahisəyə görə Trampı düşmən hesab etmir:

“Amerika lideri son günlərin qızğın müzakirələrinə baxmayaraq, Ukraynanın tərəfdaşı olaraq qalır. Kiyev ABŞ-la konstruktiv münasibətləri saxlamalı və fikir ayrılıqlarını ikitərəfli münasibətlər çərçivəsində həll etməlidir”.

Zelenskinin Trampla münasibətləri necə bərpa edə biləcəyi ilə bağlı suala cavabında Podolyak deyib ki, ABŞ prezidenti və onun komandası ilə “dostlaşmaq” söhbəti yoxdur:

“Bu, geosiyasət məsələsidir. Ukrayna üçün ABŞ-la müsbət ikitərəfli münasibətləri davam etdirmək son dərəcə vacibdir”.

O qeyd edib ki, Ukraynanın ABŞ-a ehtiyacı var, çünki o, hərbi məhsulların ən böyük istehsalçısıdır. Podolyak ABŞ-ın diplomatik dəstəyinin ağırlığını “müqayisəolunmaz” adlandırıb.