Almaniyada fevralın 23-də keçirilən parlament seçkilərinin qalibi Xristian Birlik Partiyaları (CDU/CSU) ilə Sosial Demokrat Partiyası (SPD) arasında koalisiya müzakirələrinə başlamaq üçün əsas məsələlər barədə razılığın əldə olunduğu açıqlanıb.

Axar.az xəbər verir ki, bu barədə CDU sədri Fridrix Merz, CSU sədri Markus Söder, SPD-nin həmsədrləri Lars Klinqbayl və Saskia Esken Berlində təşkil olunan birgə mətbuat konfransında məlumat veriblər.

Fridrix Merz müzakirələrdə miqrasiya, maliyyə, əmək bazarı, iqtisadiyyat mövzularının diqqət mərkəzində saxlanıldığını vurğulayıb. O, yeni hökumətin fəaliyyətə başlayacağı gündən etibarən sərhəd yoxlamalarını ciddi şəkildə artıracağını, ölkədən sığınacaq almaq üçün müraciətlərlə bağlı sərhədlərdən geri qaytarmaların həyata keçiriləcəyini açıqlayıb. Həmçinin ölkə iqtisadiyyatının 1-2 faizlik böyümə hədəfinin müəyyən edildiyi elan olunub.