2025.03.11. 19:50

ABŞ Kanada məhsullarına yeni tariflər tətbiq edib.

Axar.az xəbər verir ki, bu barədə ABŞ Prezidenti Donald Tramp “Truth Social”da yazıb.

Belə ki, martın 12-dən Kanadadan idxal olunan polad və alüminiuma tətbiq edilən gömrük rüsumları 25 faizdən 50 faizədək artırılacaq.

Tramp bu qərarın Kanada hakimiyyətinin ABŞ-a verilən elektrik enerjisinə tariflər tətbiq etməsinə cavab olaraq verildiyini vurğulayıb.

***

ABŞ Prezidenti Donald Tramp Kanadadan ABŞ-a polad və alüminium tədarükünə rüsumların 50%-ə qədər artırılması qərarından imtina edib.

Bu barədə jurnalistlərə Ağ Evin sözçüsü Kuş Desay bildirib.

Onun sözlərinə görə, buna səbəb Kanadanın elektrik enerjisinə görə tarif tətbiqini geri çəkməsidir.

Desay bildirib ki, Trampın təhdidi öz bəhrəsini verib:

"Prezident Tramp növbəti dəfə dünyanın ən böyük və güclü iqtisadiyyatı olan ABŞ-ın rıçaqlarından istifadə etdi. Buna baxmayaraq, 25 faizlik idxal tarifi - polad və alüminium daxil tarifləri, istisnalar və ya güzəştlər olmadan, Kanada üçün qüvvədədir”.

Qeyd edək ki, Tramp Kanada və Meksikadan idxala 25%, Çindən idxala isə 20% rüsumu 4 martdan tətbiq edib.