Tehran və Vaşinqton vasitəçilərlə birlikdə İranın nüvə proqramı ilə bağlı məsləhətləşmələr aparır.

Axar.az xəbər verir ki, bunu İranın xarici işlər naziri Abbas Arakçı deyib.

“Nüvə məsələləri üzrə mümkün danışıqlara gəlincə, bizim planımız və düşünülmüş strategiyamız var. Danışıqlar vasitəçilərlə davam edir və üç Avropa ölkəsi ilə də qarşılıqlı əlaqə kanalı saxlanılır”, - o bildirib.

Arakçı əlavə edib ki, İran Beynəlxalq Atom Enerjisi Agentliyi və onun baş direktoru Rafael Qrossi ilə əməkdaşlıq edir.

O, İranın ABŞ-la danışıqlar masasına oturmamasının səbəbini də açıqlayıb:

“Qarşı tərəfin maksimum təzyiq siyasətini tətbiq etdiyi bir şəraitdə ABŞ-la danışıqlara başlasaq, o zaman açıq-aşkar zəif mövqedən danışıqlara girəcəyik və heç bir nəticə əldə etməyəcəyik. Söhbət inadkarlıqdan və ya idealist prinsiplərdən deyil, peşəkar yanaşmadan gedir. Qarşı tərəfə sübut etmək lazımdır ki, təzyiq strategiyası səmərəsizdir və yalnız bundan sonra bərabər şərtlərlə danışıqlar masasına oturmaq mümkün olacaq”.