Rusiya Xarici İşlər Nazirliyinin əməkdaşının Paris hava limanında saxlanması ilə bağlı Fransa səfiri XİN-ə çağırılıb.

Axar.az xəbər verir ki, bunu Rusiya XİN-in rəsmi nümayəndəsi Mariya Zaxarova deyib.

“Aprelin 6-da Şarl de Qoll hava limanında baş verənlər heç bir izahata sığımır. Fransa Sərhəd Xidməti Rusiya XİN-in əməkdaşını, Rusiya rəsmi nümayəndə heyətinin üzvünü heç bir izahat vermədən saxlayıb, telefonunu və kompüterini müsadirə edib. Rusiya səfirliyi dərhal konsulluq əməkdaşını hava limanına göndərib. Diplomat rəsmi nümayəndə heyətinin tərkibində olan həmkarını görməyə icazə almaq üçün təxminən 7 saat gözləməli olub. Rusiyanın Parisdəki səfirliyi Fransa XİN-ə etiraz notası göndərib.

Rusiya Xarici İşlər Nazirliyi Fransa səfirliyinin rəhbərliyinə öz etirazını bildirib. Atılan addımlar nəticəsində həmkarımıza sonda ölkəyə giriş icazəsi verilsə də, o, bir gün hava limanının sərhəd zonasında qalmalı olub”, - o bildirib.