Suriya rejiminin ən böyük müttəfiqi olan İranın prezidenti Bəşər Əsədə hərbi yardım göndərməkdə davam edir.

"Axar.az" türk mətbuatına istinadən xəbər verir ki, İran Əsəd rejiminə yardım üçün yüzlərlə hərbi heyəti Suriyaya göndərb.

Göndərilən hərbçilər arasında İran İnqilab Keşikçiləri Korpusunun xarici əməliyyatlar üzrə bölüyü olan Qüds Qüvvələrinin komandirləri də yer alır.

Aktiv əməliyyatlarda iştirak etməyən iranlı hərbçilər əsasən kəşfiyyat məlumatları toplamaq işində və hərbi təlimlərdə Əsəd qüvvələrinə yardım edirlər. İnqilab Keşikçiləri Korpusunun əsgərləri əməliyyatları Qüds Qüvvələrinin təlimatları əsasında həyata keçirirlər. İranın nəzarətində olan qüvvələrin əsasən Lazkiyə və Tartus kimi önəmli liman şəhərlərində əməliyyatlar apardıqları bildirilir. Həmin qüvvələrə Suriya pasportu verilib, Suriya hərbi geyimlərindən istifadə etdikləri və Suriya ordusunun ən fəal bölməsi sayılan hava kəşfiyyatı ilə işlədikləri xəbərlərdə qeyd olunur.

Bundan başqa "Bəsic" kimi tanınan minlərlə könüllünün də Suriyaya döyüşməyə getdiyi bildirilir.