Rusiya Prezidenti Vladimir Putin və Ukrayna Prezidenti Vladimir Zelenski arasında İstanbulda planlaşdırılan danışıqlar zamanı görüşün baş tutmaması Türkiyə ilə bağlı deyil.

Axar.az xəbər verir ki, bu sözləri Türkiyə Prezidenti Rəcəb Tayyib Ərdoğan deyib.

“Bu baxımdan, vəziyyətin (Putin və Zelenski arasında təmasların olmaması - red.) bizə aidiyyəti yoxdur. Əgər bu məsələdə aktiv mövqe tutan liderlərə baxsaq, cənab Putin önəmli və aparıcı fiqurdur. Cənab Tramp da dominant oyunçudur. Cənab Zelenski də eyni vəziyyətdədir. Biz onların hamısına çağırış etmişik. 2022-ci il fevralın 24-də başlayan müharibəyə son qoyulması və bölgədə sülhün bərqərar olması üçün iki ölkə nümayəndə heyətlərinin İstanbulda bir araya gəlməsi son dərəcə vacib idi. Türkiyə lap əvvəldən müharibənin bitməsi üçün çox səy göstərir. Bu görüş də son nəticədə sülhün qapılarını açacaq mühüm addım kimi planlaşdırılırdı. Türkiyə olaraq ədalətli və davamlı sülh üçün çalışırıq. Biz təkcə müharibəyə son demirik, bunun üçün üsullar da təklif edirik, zəmin hazırlayır, çağırışlar edirik. Müharibənin bitməsi üçün ilk növbədə silahlar susmalı, diplomatiya danışmalıdır. Bizim ən böyük arzumuz sülh danışıqlarından qəti nəticə əldə etməkdir. Biz dialoq kanallarının açıq qalması və tərəflər arasında danışıqların davam etdirilməsi üçün hər cür səy göstərəcəyik”, - Türkiyə lideri əlavə edib.