Sovet İttifaqı dağılanda hüquqi prosedur pozulub, bu isə o deməkdir ki, SSRİ hələ də mövcuddur.

Axar.az xəbər verir ki, bunu Rusiya prezidentinin müşaviri Anton Kobyakov deyib.

O bildirib ki, bu, Ukraynadakı müharibənin “daxili proses” olduğunu söyləməyə imkan verir:

“SSRİ Xalq Deputatları Qurultayının qərarı ilə yaradılıb, ona görə də həmin qurumun qərarı ilə ləğv edilməli idi. İttifaq respublikalarının Ali Sovetlərinin Belovejsk sazişlərini ratifikasiya etmək səlahiyyəti yox idi. Əgər hüquqi prosedur pozulubsa, onda belə çıxır ki, qanuni olaraq SSRİ mövcuddur. Bunu konstitusiya hüququ ekspertləri deyir. Amma SSRİ dağılmayıbsa, məntiqlə, hüquqi baxımdan Ukrayna böhranının daxili proses olduğu ortaya çıxır. SSRİ-nin dağılmasına hüquqi qiymət konstitusiya hüququ ekspertləri tərəfindən verilməlidir”.