Ukrayna tərəfi qəfil şəkildə həm həlak olmuş hərbçilərin nəşlərinin qəbulunu, həm də hərbi əsirlərin mübadiləsini qeyri-müəyyən vaxta qədər təxirə salıb.

Axar.az xəbər verir ki, bu barədə Rusiya prezidentinin köməkçisi Vladimir Medinski məlumat yayıb.

O bildirib ki, Rusiya tərəfi İstanbul razılaşmalarına tam uyğun şəkildə 6 iyun tarixində Ukraynaya 6 mindən çox həlak olmuş Ukrayna Silahlı Qüvvələri hərbçisinin nəşinin təhvil verilməsi və yaralı, ağır xəstə, həmçinin 25 yaşdan kiçik hərbi əsirlərin mübadiləsinə dair humanitar aksiyanın icrasına başlayıb:

“Ukrayna Silahlı Qüvvələrinin 1 212 nəfərlik ilk partiya donmuş cəsəd artıq soyuducu konteynerlərdə mübadilə məntəqəsinə çatdırılıb. Qalan cəsədlər də yoldadır. Bundan əlavə, “yaralılar, ağır xəstələr və gənclər” kateqoriyasına daxil olan 640 hərbi əsirin siyahısı Ukrayna tərəfinə təqdim olunub ki, mübadilə prosesi başlaya bilsin. Rusiya Müdafiə Nazirliyinin əlaqə qrupu artıq Ukrayna sərhədindədir".

O əlavə edib ki, Rusiya Ukrayna tərəfini 6 min hərbçinin nəşini götürməyə çağırır ki, ailələri onları insan kimi dəfn edə bilsinlər.