Müxtəlif səbəblərdən dolayı insanlar saç tökülməsi problem ilə qarşılaşırlar. İnsanlar bu problemin qarşısını almaq üçün müxtəlif yollara əl atsalar da, əksərən yanlış metodlardan istifadə edirlər.

Axar.az saça qulluqla bağlı insanların doğru bildiyi 9 yanlışı təqdim edir:

1. Şampun yerinə sabun istifadə etmək

Bəzilərimiz şampun yerinə sabun istifadə etməyi doğru hesab edirik. Əslində isə sabunun şampundan üstünlüyü yoxdur. Ancaq təbii tərkibə malik və tərkibində zeytun yağı olan sabunlar ziyanlı deyillər. Burda əsas olan sabunun keyfiyyətli olmasından çox sizin saçınızın quruluşudur. Məsələn: sabun təbii tərkibə malik olsa da, saçınız uyğun gəlmədiyindən saç köklərinə və dərisinə ziyan vura bilər. Bu zaman qaşıntı və saç tökülməsi baş verir.

2. Saçın tez-tez yuyulması

Əslində, saçı tez-tez yumaq doğru deyil. Çünki saç dərisinin üzərində lipid təbəqəsi vardır ki, hər gün yuyulduqda bu təbəqə özünü bərpa edə bilmir. Bu isə saç dərisinin qurumasına səbəb olur, mikro çatlar əmələ gətirir. Belə dəri xəstəliklərə qarşı da müdafiəsiz olur. Uzun müddət yumamaq da düzgün deyil. Çünki saçımıza yapışan toz və kir uzun müddət təmizlənmədikdə saçın quruluşuna təsir edir, onu solğunlaşdırır. Belə saçın kökü çox yağlandığından saçımıza sığal çəkdikdə belə saç tökülməsini hiss edə bilirik.

3. Saçı toplamaq

Saçlarda fiziki gərginlik yaratmaq, dartmaq lazım deyil. Gündəlik həyatda istifadə etdiyimiz at quyruğu saç düzümü saçı uzun müddət gərilmiş halda saxlayır. Bu çox vaxt alopesiya adlı xəstəliyə - saç tökülməsinin xüsusi növünə gətirib çıxarır. Xüsusilə anaların qız uşaqlarının saçını rəngli rezin sancaqlarla sıx dartılmış halda yığması saç tökülməsinə səbəb olan əsas səbəblərdən biridir.

4. Saçı tez-tez qısa kəsdirmək

Əslində, tez-tez saç kəsdirmək saç uzanmasına bir o qədər də təsir etmir. "Saçımı kəsdirsəm, saç tökülməsinin qarşısını ala bilərəm", - fikri yanlışdır.

5. Təmiz olsunlar deyə saçı isti su ilə yumaq

Saçı yuyarkən isti sudan istifadə etmək doğru deyil. Tam əksinə, isti su saçın dərisini qurudur, strukturunu pozur, dəri qabıq verir, qaşınır.

6. "Eyni bir şampunu istifadə etməyin heç bir zərəri yoxdur"

Ən çox edilən səhvlər arasında məhz bu fikir dayanır. Evdə olan, hamının istifadə etdiyi ortaq şampun heç də hamının saçının strukturuna uyğun gəlməyə bilər. Belə ki, yağlı saçlar üçün yağlanmanın qarşısını alan şampunlar, quru saçlar üçün isə nəmləndirici şampunlar doğru hesab olunur. Bunun əksi saç dərisinə, saçın köklərinə mənfi təsir göstərir.

7. "Çox köpüklənməyən şampun yaxşı təmizləmir"

Çox köpüklənən şampunlara diqqət etmək lazımdır. Əgər şampun çox köpük verirsə, deməli, tərkibində kimyəvi maddələr daha çoxdur. Bitki tərkibli şampunlar köpük əmələ gətirmədən də saçı yaxşı təmizləyirlər. Buna görə də şampun alanda onun gözəl qoxulu, yaxşı köpüklənməsini əsas götürməkdənsə, tərkibinə, xüsusən bitki tərkibli olmasına diqqət yetirin.

8. "Saç kremləri saçı tökür"

Saç kremlərinin tərkibi saçın quruluşuna uyğun hazırlanır. Buna görə də düzgün seçilən krem saçı tökmür, tam əksinə, zədələnmiş saçı bərpa etməyə yardımçı olur. Saç kremlərini daha çox uzun saçlarda istifadə etməyiniz məsləhətdir.

9. "Papaq qoymaq saçı tökür"

Hər fəslə uyğun papaq qoymaq başımızın dərisini, istidən, soyuqdan, yağışdan, küləkdən, çirkli havadan qoruyur. Buna görə də "papaq geymək saçlara ziyandır" fikri tamamilə yanlışdır. Amma diqqətli olmaq lazımdır: papaq dar, sintetik liflərdən hazırlanmış olmamalıdır. Dar papaq başımızda qan dövranını pozur və nəticədə saçın oksigenlə təmin olunmasında problem yaranır.