Amerikalı elm adamları tərəfindən aparılan araşdırmada yetkinlik yaşlarında uşaq dünyaya gətirən qadınların IQ səviyyəsinin artdığı məlum olub.

Axar.az xəbər verir ki, Cənubi Kaliforniya Universiteti tərəfindən aparılan araşdırma çərçivəsində orta yaşlı 830 qadının məlumatları incələnib. Eyni zamanda gənc yaşda uşaq sahibi olmaq və beyin fəaliyyətləri arasında əlaqə araşdırılıb.

Araşdırmanın nəticəsində 35 yaşdan sonra ana olan qadınların yaddaşlarının və qavrama bacarıqlarının gənc yaşda ana olan qadınlarla müqayisədə daha yaxşı olduğu müşahidə edilib.

20 yaşlarında ana olmaq isə beyinin fəaliyyətində hər hansı bir dəyişiklik yaratmır.

Tədqiqatı davam etdirən həkim Roksana Karim bu kəşfi haqda danışarkən deyib:

"Bu kəşfi digər mütəxəssislər də təsdiq edərsə, qadınların yaşlanarkən məruz qaldığı altsaymer xəstəliyinin müalicəsi üçün yeni bir ümid ola bilər".

Qeyd edək ki, altsaymer xəstəliyi bəzi beyin hüceyrələrinin məhv olması ilə nəticələnən, dəqiq səbəbləri bilinməyən nevroloji bir xəstəlikdir. Xəstəlik klinik olaraq incələnən zaman yaddaş və digər intellektual qabiliyyətlərin nəzərəçarpacaq dərəcədə pozulması ilə qarşımıza çıxır.