Koronavirusa qalib gəlməyin yeganə yolu testləşdirmə sayını çoxaltmaq və yoluxan xəstələri vaxtında müalicə etməkdir.

Bunu Axar.az-a həkim Qalib Əsədov deyib. O bildirib ki, karantinin bundan sonra sərtləşdirilməsinin nəticəsi olmaya bilər:

“İstənilən infeksion xəstəliklərə qalib gəlmək üçün əsas iki şərt var:

1. İnfeksion ocaq (xəstə) mümkün qədər tez aşkar olunmalıdır.

2. Dərhal müalicə tədbirlərinə başlanmalıdır.

Koronavirusa qalib gəlmək üçün dünya praktikasından yaralanmaq lazımdır. İri ticarət mərkəzlərini, restoran-kafeləri bağlamaq düzgün addım deyil. Yalnız mümkün qədər çoxlu test müayinəsi aparmaq və nəticəsi pozitiv çıxanları, onlarla ünsiyyətdə olanları nəzarətdə saxlamaq lazımdır. Əgər bu gün səhiyyəmiz hərarəti olan xəstədə COVİD-19 diaqnozunu ən tezi bir həftəyə qoyursa, apteklərdə antiviral dərmanlar yoxdursa, bu zaman görülən bütün digər karantin tədbirlərinin heç bir mənası və əhəmiyyəti yoxdur. Bu problem həll olunmasa, xəstələrin və həyatını itirənlərin sayı daha da çoxalacaq”.